អគ្គស្នងការដ្ឋាននគរបាលជាតិ បានប្រកាសកែសម្រួលសមាសភាព ក្រុមព័ត៌មានទាន់ហេតុការណ៍ (HOTLINE) សម្រាប់ជនបរទេសទាំងអស់នៅកម្ពុជា នៅព្រឹកថ្ងៃទី ៦ ខែសីហា ២០២៥ ក្រោមអធិបតីភាព នាយឧត្តមសេនីយ៍ ស ថេត អគ្គស្នងការនគរបាលជាតិ និងមានការចូលរួមពីតំណាងស្ថានទូត និងស្ថានកុងស៊ុលទាំងអស់ក្នុងព្រះរាជាណាចក្រកម្ពុជា។
នាយឧត្តមសេនីយ៍ ស ថេត បានពន្យល់ថា ការបង្កើតសមាសភាពថ្មីនៃក្រុម HOTLINE នេះ មានគោលបំណងសំខាន់ក្នុងការផ្តល់ភាពងាយស្រួលសម្រាប់កិច្ចសហការ និងទំនាក់ទំនងល្អជាមួយស្ថានទូត និងស្ថានកុងស៊ុល ដើម្បីផ្លាស់ប្តូរព័ត៌មានទាក់ទងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។
ក្រុមព័ត៌មានទាន់ហេតុការណ៍ ត្រូវបានបង្កើតឡើងសម្រាប់គោលដៅចម្បង៖
ផ្លាស់ប្តូរព័ត៌មានរហ័ស អំពីស្ថានភាព និងសភាពជនបរទេសនៅកម្ពុជា ដើម្បីធានាសន្តិសុខ និងសុវត្ថិភាពរបស់ពួកគេ
ពង្រឹងកិច្ចសហការ រវាងកងកម្លាំងសន្តិសុខ និងជនបរទេសដែលរស់នៅក្នុងប្រទេសកម្ពុជា សម្រាប់ការបង្ការ និងទប់ស្កាត់បទល្មើស អំពើភេរវកម្ម និងអសន្តិសុខផ្សេងៗ
លើកកម្ពស់ប្រសិទ្ធភាពការងារ ការពារសន្តិសុខ សណ្តាប់ធ្នាប់សាធារណៈ និងជួយធានាសុវត្ថិភាពដល់និវេសនដ្ឋាន ស្ថានទូត ស្ថានកុងស៊ុល និងមន្រ្តីការទូតទាំងអស់
ការពារវិនិយោគិន និងភ្ញៀវទេសចរ ដើម្បីបង្កើនភាពទុកចិត្ត និងទាក់ទាញវិនិយោគ និងទេសចរណ៍អន្តរជាតិ
អគ្គស្នងការដ្ឋាននគរបាលជាតិបានបញ្ជាក់ថា ក្រោមការគាំទ្រពីរាជរដ្ឋាភិបាល និងក្រសួងមហាផ្ទៃ ក្រុម HOTLINE នេះនឹងជួយដល់ការទទួលខុសត្រូវ និងបេសកកម្មការពារសន្តិសុខជាតិ ដោយផ្តោតលើការបង្ការ ទប់ស្កាត់ និងបង្ក្រាបបទល្មើសគ្រប់ប្រភេទ រួមទាំងបទល្មើសតាមបច្ចេកវិទ្យា។
HOTLINE ថ្មីនេះ នឹងទទួលដោះស្រាយសំណើ និងទុក្ខកង្វល់របស់ជនបរទេសយ៉ាងឆាប់រហ័ស និងទាន់ពេលវេលា ដោយផ្ទាល់ឬតាមរយៈស្ថានទូត និងស្ថានកុងស៊ុល ដែលមានបេសកកម្មនៅកម្ពុជា។ គោលដៅចម្បងគឺដើម្បីបង្កើនការជឿជាក់ទាំងក្នុងប្រទេស និងអន្តរជាតិ លើការដឹកនាំរបស់រាជរដ្ឋាភិបាលកម្ពុជា និងក្រសួងមហាផ្ទៃ ហើយបង្ហាញពីប្តេជ្ញាចិត្តខ្ពស់របស់អគ្គស្នងការដ្ឋាននគរបាលជាតិ។
