អគ្គនាយកនៃមជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) លោក ហេង រតនា អះអាងថា ស៊ីម៉ាក់រកឃើញសំណល់គ្រាប់បែកចំនួនជាង ១ពាន់គ្រាប់នៅក្នុងភូមិសាស្ត្រខេត្តឧត្ដរមានជ័យ ដែលសុទ្ធសឹងតែជាគ្រាប់ដែលត្រូវបានទម្លាក់ដោយកងទ័ពអាកាសថៃ អំឡុងពេលនៃការផ្ទុះអាវុធនៅតាមព្រំដែនរយៈពេល ៥ថ្ងៃ ចាប់តាំងពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥។
លោក ហេង រតនា បង្ហោះលើបណ្ដាញសង្គមហ្វេសប៊ុកផ្ទាល់ខ្លួនលោកថា មជ្ឈមណ្ឌលសកម្មភាពកម្ចាត់មីនកម្ពុជា បានរកឃើញគ្រាប់បែក និងគ្រាប់កាំភ្លើងធំចំនួន ១៥៤៩គ្រាប់ ស្ថិតនៅក្នុងភូមិសាស្ត្រខេត្តឧត្ដរមានជ័យ ដែលសុទ្ធសឹងតែជាគ្រាប់បន្សល់ទុកក្រោយការឈ្លានពានរបស់ថៃ។
លោក ហេង រតនា ឲ្យដឹងទៀតថា កាលពីថ្ងៃអាទិត្យ ទី១០ សីហា ក្រុមអនុព័ន្ធយោធាបរទេសចំនួន ១៤រូប មកពី ៩ប្រទេស បានទៅពិនិត្យទីតាំងភូមិថ្មដូន ឃុំគោកមន ស្រុកបន្ទាយអំពិល ខេត្តឧត្ដរមានជ័យ ត្រង់ចំណុចដែលគ្រាប់បែកប្រភេទ MK-84 ធ្លាក់ចំផ្ទះពលរដ្ឋខ្មែរ។
លោកអះអាងថា អង្គភាពស៊ីម៉ាក់ក៏កំពុងបន្តស្រាវជ្រាវរកទីតាំងសំណល់គ្រាប់បែក និងគ្រាប់ប្លោងបន្ថែមទៀត ក្នុងនោះរួមមានការដាក់ស្លាកសញ្ញា និងបោសសម្អាតគ្រាប់បែក និងគ្រាប់កាំភ្លើងធំគ្រប់ប្រភេទ ដើម្បីធានាសុវត្ថិភាពដល់ពលរដ្ឋនៅតាមព្រំដែនកម្ពុជា-ថៃ។
លោកអំពាវនាវឱ្យពលរដ្ឋទាក់ទងកម្លាំងជំនាញក្នុងករណីសង្ស័យជួបគ្រាប់មិនទាន់ផ្ទុះ ដើម្បីបញ្ចៀសគ្រោះថ្នាក់ផ្សេងៗដែលអាចកើតមានជាយថាហេតុ។
កន្លងមក អ្នកនាំពាក្យកងទ័ពអាកាសថៃ លោក Prapas Sornchaidee ធ្លាប់អះអាងថា គ្រាប់បែកប្រភេទ MK-84 ដែលធ្លាក់ចំផ្ទះពលរដ្ឋខ្មែរនោះ គឺមិនមែនជាគ្រាប់ដែលទម្លាក់ដោយទ័ពអាកាសថៃ ទេ គឺជាគ្រាប់ដែលអាចបន្សល់ទុកនៅកម្ពុជា តាំងពីសង្គ្រាមឥណ្ឌូចិន។
ប៉ុន្តែកម្ពុជា អះអាងថា គ្រាប់បែកប្រភេទ MK-84 គឺជាគ្រាប់ផលិតនៅក្នុងឆ្នាំ១៩៩៦ និងជាគ្រាប់ដែលថៃ ទិញពីក្រុមហ៊ុន IMI របស់ប្រទេសអ៊ីស្រាអែល យកមកប្រើប្រាស់ក្នុងពេលជម្លោះព្រំដែនជាមួយកម្ពុជា។
ជុំវិញជម្លោះកម្ពុជា-ថៃ នាពេលនេះ អភិបាលរងខេត្តព្រះវិហារ លោក គឹម ចាន់បញ្ញា បានអះអាងកាលពីថ្ងៃទី១០ សីហា ថា ចាប់តាំងពីព្រឹត្តិការណ៍ផ្ទុះអាវុធនៅតាមព្រំដែនកម្ពុជា-ថៃ កាលពីថ្ងៃទី២៤ កក្កដា មក ពលរដ្ឋក្នុងខេត្តព្រះវិហារ ជាង ១ម៉ឺនគ្រួសារ (១១៨១៧គ្រួសារ) ស្មើនឹងមនុស្សជិត ៤ម៉ឺននាក់ (៣៩៣១១នាក់) បានភៀសខ្លួន ដែលក្នុងនោះក៏មានស្ត្រីជាង ២ម៉ឺននាក់ផងដែរ (២០៩០៥នាក់)៕
