August 14, 2025

ថ្ងៃទី ១៣ សីហា ២០២៥ – គណៈប្រតិភូវិនិយោគិនចិន ពីទីក្រុងប៉េកាំង និងខេត្តអានហួយ បានមកទស្សនកិច្ច និងជួបពិភាក្សាការងារជាមួយ ឯកឧត្តម លឹម វិសាល អគ្គលេខាធិការរង គណៈកម្មាធិការវិនិយោគកម្ពុជា (CDC) ដើម្បីស្វែងយល់អំពីបរិយាកាសវិនិយោគ និងឱកាសវិនិយោគក្នុងវិស័យឧស្សាហកម្មឈើដាំ និងកម្មន្តសាលវាយនភណ្ឌពីដើមដល់ចុង។ ឯកឧត្តមលឹម វិសាល បានលើកឡើងពីទំនាក់ទំនងជិតស្និទ្ធកម្ពុជា–ចិន ការសហប្រតិបត្តិការអភិវឌ្ឍន៍ និងការគាំទ្រពីរដ្ឋាភិបាលចិនក្នុងការកសាងហេដ្ឋារចនាសម្ព័ន្ធ។ ក៏បានពន្យល់អំពីស្ថានភាពវិនិយោគ ក្របខ័ណ្ឌច្បាប់ និងរបបលើកទឹកចិត្តវិនិយោគ ដូចជាយន្តការកិច្ចសន្ទនារដ្ឋ–ឯកជនសម្រាប់ការថែទាំ និងទាក់ទាញវិនិយោគ។ តំណាងវិនិយោគិនបានបញ្ជាក់ថា គោលបំណងនៃការទស្សនកិច្ចគឺដើម្បីស្វែងយល់ជ្រាលជ្រៅពីឱកាសវិនិយោគ ជាពិសេសវិស័យឧស្សាហកម្មឈើដាំ និងកម្មន្តសាលវាយនភណ្ឌ។ អគ្គលេខាធិការរងបានស្វាគមន៍ និងគាំទ្រគម្រោងវិនិយោគទាំងនេះ ដោយសង្កត់ថា វាជាគម្រោងទទួលបានការលើកទឹកចិត្តតាមច្បាប់ជាធរមាន។ ការវិនិយោគក្នុងកម្មន្តសាលវាយនភណ្ឌពេញវដ្ត (ពីផលិតក្រណាត់ និងឡេវ ដល់ការផលិតសម្លៀកបំពាក់) ស្របតាមគោលនយោបាយរដ្ឋាភិបាលក្នុងការផលិតវត្ថុធាតុដើមក្នុងស្រុក បង្កើនតម្លៃបន្ថែម និងបំពេញតម្រូវការទីផ្សារនាំចេញ ជាពិសេសក្នុងបរិបទកម្ពុជាចាកចេញពីជាប់បញ្ជីប្រទេសអភិវឌ្ឍន៍តិចតួច (LDC) នៅចុងឆ្នាំ ២០២៩ ដែលវិធានប្រភពដើមទំនិញសម្រាប់ទីផ្សារអឺរ៉ុបនឹងទាមទារការបម្លែងពីរដំណាក់កាល។

ថ្ងៃពុធ ទី១៣ ខែសីហា ឆ្នាំ២០២៥ ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាលនៃសហគ្រិនខ្មែរ បានដឹកនាំកិច្ចប្រជុំក្រុមប្រឹក្សាបរធនបាលលើកទី ១៨ ដើម្បីបូកសរុបការងារ និងវាយតម្លៃសមិទ្ធផលសំខាន់ៗដែលសម្រេចបានត្រឹមឆមាសទី១ ឆ្នាំ២០២៥។ កិច្ចប្រជុំនេះ ក៏បានសម្រេចលើការកំណត់យុទ្ធសាស្រ្តជាបន្តដើម្បីឆ្លើយតបនឹងស្ថានភាពបច្ចុប្បន្ន និងចក្ខុវិស័យនាពេលអនាគតក្នុងការ លើកស្ទួយ និងពង្រឹងប្រព័ន្ធអេកូឡូស៊ីសហគ្រិនភាពនៅកម្ពុជា។ចំណុចសំខាន់នៅក្នុងកិច្ចប្រជុំ គឺការស្នើអនុម័តគម្រោងជាច្រើនរបស់សហគ្រិនខ្មែរ ដើម្បីឆ្លើយតបឲ្យទាន់នឹងសភាពការណ៍ សេដ្ឋកិច្ចបច្ចុប្បន្ន ក្នុងនោះរួមមាន៖កម្មវិធីកញ្ចប់ជំនួយសហគ្រិនខ្មែរ លើកទី១៣ បន្តបើកពាក្យ និងផ្តល់ជំនួយហិរញ្ញវត្ថុដល់សហគ្រិនក្នុងស្រុកទូទាំង ប្រទេសសំដៅ លើការអភិវឌ្ឍផលិតផល និងពង្រីកទីផ្សារ។កម្មវិធីសហគ្រិនវិទ្យាល័យ និង កម្មវិធីសហគ្រិនមហាវិទ្យាល័យ ក៏បានពង្រីកវិសាលភាព និងជំរុញភាពប្រកួតប្រជែង កាន់តែស្វិតស្វាញនៅទូទាំងប្រទេស។ កម្មវិធីទាំងពីរនេះបានសាបព្រោះវប្បធម៌សហគ្រិនភាពដោយផ្ទាល់ទៅកាន់ សិស្សានុសិស្សនិងនិស្សិតសរុបជាង ៨.៣០០ នាក់ដែលបានដាក់ពាក្យចូលរួមបង្ហាញគំនិតអាជីវកម្មរបស់ពួកគេនៅ ក្នុងឆ្នាំនេះ។ យុទ្ធនាការដែលសហគ្រិនខ្មែរគ្រោងនឹងធ្វើឡើងបណ្តាក់គ្នាក្នុងអំឡុងពេលខាងមុខនេះក៏ជាយន្តការជំរុញ និងលើកទឹកចិត្តសហគ្រិនយ៉ាងផុសផុលដូចជា៖១) ការប្រគល់ពានរង្វាន់សហគ្រិនឆ្នើមជាច្រើនផ្នែក រាប់ចាប់ពីវិទ្យាល័យរហូតដល់កម្រិតសហគ្រាសធុនមីក្រូ តូច និងមធ្យម។ ២) ការជួបជុំសហគ្រិនក្នុងស្រុកដើម្បីចែករំលែកបទពិសោធន៍ក្នុងការជំរុញលទ្ធភាពទទួលបានការ វិនិយោគពីវិនិយោគិនក្នុងនិងក្រៅប្រទេស។ ៣) ការកសាងទំនាក់ទំនងជាមួយស្ថាប័នកសាងប្រព័ន្ធអេកូឡូស៊ី សហគ្រិនភាពមកពីតំបន់អាស៊ី។ ៤)…