ព្រះសង្ឃខ្មែរជាង ២ពាន់អង្គ និងពុទ្ធបរិស័ទរាប់រយនាក់ ដង្ហែក្បួនធម្មយាត្រាសន្តិភាព ថ្លែងអំណរគុណប្រធានាធិបតីសហរដ្ឋអាមេរិក លោក ដូណាល់ ត្រាំ (Donald J. Trump) សម្រាប់កិច្ចព្រមព្រៀងបទឈប់បាញ់ និងស្នើឱ្យថៃ ដោះលែងទាហានខ្មែរ ១៨នាក់។
កាលពីថ្ងៃទី១០ ខែសីហា ឆ្នាំ២០២៥ ព្រះសង្ឃខ្មែរជាង ២ពាន់អង្គ (២៥៦៩អង្គ) និងពុទ្ធបរិស័ទរាប់រយនាក់ បានជួបជុំហែក្បួនធម្មយាត្រាសន្តិភាព ដើម្បីឱ្យមានការគោរពបទឈប់បាញ់ជានិរន្តរ៍រវាងកម្ពុជា-ថៃ ដោយដង្ហែចេញពីរមណីយដ្ឋានវប្បធម៌ប្រវត្តិសាស្ត្រវត្តភ្នំ ឆ្ពោះទៅកាន់វិមានឯករាជ្យ។
ក្នុងពិធីដង្ហែធម្មយាត្រានេះ សម្តេចព្រះមហាអរិយវង្សបណ្ឌិត យ៉ន សេងយៀត ព្រះចៅអធិការវត្តឧណ្ណាលោម មានថេរៈដីកាថា កម្ពុជាត្រូវការសន្តិភាព ស្ថិរភាព សុវត្ថិភាពជានិរន្តរ៍ ព្រោះសន្តិភាពជាឫសគល់នៃការអភិវឌ្ឍទាំងអស់។
តំណាងព្រះសង្ឃនៃធម្មយាត្រាសន្តិភាពអង្គនេះ លើកឡើងថា ដោយមើលឃើញអំពីសារសំខាន់នៃសន្តិភាព គណៈសង្ឃនាយកទាំងពីរគណៈ បានសុំបិណ្ឌបាតភាគីថៃ ឱ្យមានការគោរពបទឈប់បាញ់ជានិរន្តរ៍ និងសុំបិណ្ឌបាតភាគីថៃ ឱ្យដោះលែងកងទ័ពខ្មែរទាំង ១៨រូប ដែលយោធាថៃ បានចាប់ធ្វើជាចំណាប់ខ្មាំងផងដែរ។
ព្រះអង្គបន្ថែមថា ការបិណ្ឌបាតនេះ គឺដោយសារតែប្រទេសទាំងពីរជាអ្នកគោរពព្រះពុទ្ធសាសនាថេរវាទដូចគ្នា ហើយក៏ដើម្បីជាប្រយោជន៍ដ៏ឧត្តុង្គឧត្តមសម្រាប់សេចក្តីសុខក្សេមក្សាន្តត្រជាក់ត្រជំដល់ប្រជាជាតិខ្មែរ និងសកលលោកទាំងមូល។
ជុំវិញបញ្ហានេះ ព្រះសង្ឃ និងពលរដ្ឋខ្មែរនៅសហរដ្ឋអាមេរិក មកពីជាង ៣០រដ្ឋ កាលពីថ្ងៃទី១០ ខែសីហា ក៏បានធ្វើពិធីដង្ហែធម្មយាត្រាដើម្បីសន្តិភាព ស្នើសុំភាគីថៃ គោរពបទឈប់បាញ់ និងដោះលែងជាបន្ទាន់នូវវីរកងទ័ពខ្មែរទាំង ១៨នាក់ផងដែរ។
សង្គ្រាមកម្ពុជា-ថៃ បានរំលត់ទៅវិញក្រោមបទឈប់បាញ់ដោយមានការផ្ដួចផ្ដើមរបស់ប្រធានាធិបតីអាមេរិក លោក ដូណាល់ ត្រាំ ដែលត្រូវបានសម្របសម្រួលដោយប្រធានអាស៊ាន លោក អាន់វ៉ា អ៊ីប្រាហ៊ីម ក្នុងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (Extraordinary GBC Meeting) ក្នុងទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី៧ ខែសីហា កន្លងទៅ។
កាលពីថ្ងៃទី១០ សីហា មេបញ្ជាការកងពលតូចថ្មើរជើងលេខ៤២ ប្រចាំការប្រាសាទតាមាន់ធំ ឧត្តមសេនីយ៍ត្រី នាក់ វង្ស បានប្រាប់ក្រុមអនុព័ន្ធយោធាបរទេសថា យោធាថៃ បានប្រើប្រាស់គ្រាប់ចំពាមកៅស៊ូបាញ់មកលើកងទ័ពកម្ពុជា ចំនួន ១០០គ្រាប់ កាលពីយប់ថ្ងៃទី៩ ខែសីហា ចូលលេណដ្ឋានទាហានខ្មែរ ខណៈទាហានខ្មែរមិនមានការតបតអ្វីនោះឡើយ។ ជុំវិញជម្លោះកម្ពុជា-ថៃ នាពេលនេះ អភិបាលរងខេត្តព្រះវិហារ លោក គឹម ចាន់បញ្ញា អះអាងកាលពីថ្ងៃទី១០ សីហា ថា ចាប់តាំងពីព្រឹត្តិការណ៍ផ្ទុះអាវុធនៅតាមព្រំដែនកម្ពុជា-ថៃ កាលពីថ្ងៃទី២៤ កក្កដា មក ពលរដ្ឋក្នុងខេត្តព្រះវិហារ ជាង ១ម៉ឺនគ្រួសារ (១១៨១៧គ្រួសារ) ស្មើនឹងមនុស្សជិត ៤ម៉ឺននាក់ (៣៩៣១១នាក់) បានភៀសខ្លួន ដែលក្នុងនោះក៏មានស្ត្រីជាង ២ម៉ឺននាក់ផងដែរ (២០៩០៥នាក់)៕
