នៅព្រឹកថ្ងៃទី ១៤ សីហា ២០២៥ ប្រជាពលរដ្ឋជាជនភៀសសឹកមួយចំនួន បានមកស្នាក់នៅជាបណ្ដោះអាសន្ន នៅទីរួមខេត្តឧត្តរមានជ័យ ដើម្បីរង់ចាំទទួលព័ត៌មានអំពីស្ថានការណ៍បន្ត។ ប្រជាពលរដ្ឋទាំងនេះមកពីឃុំគោកខ្ពស់ ស្រុកបន្ទាយអំពិល និងពីភូមិអូរស្មាច់ ក្រុងសំរោង ខេត្តឧត្តរមានជ័យ។
ព្រះសង្ឃខ្មែរជាង ២ពាន់អង្គ និងពុទ្ធបរិស័ទរាប់រយនាក់ ដង្ហែក្បួនធម្មយាត្រាសន្តិភាព ថ្លែងអំណរគុណប្រធានាធិបតីសហរដ្ឋអាមេរិក លោក ដូណាល់ ត្រាំ (Donald J. Trump) សម្រាប់កិច្ចព្រមព្រៀងបទឈប់បាញ់ និងស្នើឱ្យថៃ ដោះលែងទាហានខ្មែរ ១៨នាក់។ កាលពីថ្ងៃទី១០ ខែសីហា ឆ្នាំ២០២៥ ព្រះសង្ឃខ្មែរជាង ២ពាន់អង្គ (២៥៦៩អង្គ) និងពុទ្ធបរិស័ទរាប់រយនាក់ បានជួបជុំហែក្បួនធម្មយាត្រាសន្តិភាព ដើម្បីឱ្យមានការគោរពបទឈប់បាញ់ជានិរន្តរ៍រវាងកម្ពុជា-ថៃ ដោយដង្ហែចេញពីរមណីយដ្ឋានវប្បធម៌ប្រវត្តិសាស្ត្រវត្តភ្នំ ឆ្ពោះទៅកាន់វិមានឯករាជ្យ។ ក្នុងពិធីដង្ហែធម្មយាត្រានេះ សម្តេចព្រះមហាអរិយវង្សបណ្ឌិត យ៉ន សេងយៀត ព្រះចៅអធិការវត្តឧណ្ណាលោម មានថេរៈដីកាថា កម្ពុជាត្រូវការសន្តិភាព ស្ថិរភាព សុវត្ថិភាពជានិរន្តរ៍ ព្រោះសន្តិភាពជាឫសគល់នៃការអភិវឌ្ឍទាំងអស់។ តំណាងព្រះសង្ឃនៃធម្មយាត្រាសន្តិភាពអង្គនេះ លើកឡើងថា ដោយមើលឃើញអំពីសារសំខាន់នៃសន្តិភាព គណៈសង្ឃនាយកទាំងពីរគណៈ បានសុំបិណ្ឌបាតភាគីថៃ ឱ្យមានការគោរពបទឈប់បាញ់ជានិរន្តរ៍ និងសុំបិណ្ឌបាតភាគីថៃ ឱ្យដោះលែងកងទ័ពខ្មែរទាំង ១៨រូប ដែលយោធាថៃ បានចាប់ធ្វើជាចំណាប់ខ្មាំងផងដែរ។ ព្រះអង្គបន្ថែមថា ការបិណ្ឌបាតនេះ គឺដោយសារតែប្រទេសទាំងពីរជាអ្នកគោរពព្រះពុទ្ធសាសនាថេរវាទដូចគ្នា ហើយក៏ដើម្បីជាប្រយោជន៍ដ៏ឧត្តុង្គឧត្តមសម្រាប់សេចក្តីសុខក្សេមក្សាន្តត្រជាក់ត្រជំដល់ប្រជាជាតិខ្មែរ និងសកលលោកទាំងមូល។ ជុំវិញបញ្ហានេះ ព្រះសង្ឃ និងពលរដ្ឋខ្មែរនៅសហរដ្ឋអាមេរិក…
ក្រសួងការពារជាតិកម្ពុជា អះអាងថា បញ្ហាព្រំដែនមិនអាចកែប្រែដោយកម្លាំងប្រដាប់អាវុធជាដាច់ខាត ប៉ុន្តែត្រូវតែដោះស្រាយដោយបច្ចេកទេស និងច្បាប់អន្តរជាតិ ខណៈកម្ពុជាប្រកាន់គោលការណ៍សន្តិភាពជាធំ និងអនុវត្តយ៉ាងខ្ជាប់ខ្ជួននូវបទឈប់បាញ់។ អ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា ថ្លែងនៅក្នុងសន្និសីទសារព័ត៌មាននៅថ្ងៃទី១១ សីហា នេះថា គោលជំហរដ៏ម៉ឺងម៉ាត់របស់កម្ពុជា គឺរកដំណោះស្រាយដោយសន្តិវិធី និងប្រកាន់គោលការណ៍សន្តិភាពជាធំ ហើយអនុវត្តយ៉ាងខ្ជាប់ខ្ជួននូវបទឈប់បាញ់។ ប្រភពដដែលបន្តថា កម្ពុជាក៏សង្ឃឹមថាភាគីថៃ នឹងប្រកាន់គោលជំហរដោយភាពស្មោះត្រង់ដែរ ក្នុងការឈានទៅបញ្ចប់ការប្រឈមមុខដាក់គ្នា ដើម្បីស្ដារមកវិញនូវសន្តិភាព ប្រក្រតីភាព និងពលរដ្ឋនៃប្រទេសទាំងពីររស់នៅក្នុងសុខសន្តិភាព។ ក្រសួងការពារជាតិ អំពាវនាវឱ្យសហគមន៍អន្តរជាតិ ជួយជំរុញយ៉ាងម៉ឺងម៉ាត់ឲ្យភាគីថៃ គោរពកិច្ចព្រមព្រៀងបទឈប់បាញ់ មិនត្រឹមតែពាក្យសម្ដីប៉ុណ្ណោះទេ តែតាមរយៈសកម្មភាពជាក់ស្ដែងផងដែរ ដោយបញ្ឈប់រាល់អំពើរំលោភបំពានទាំងឡាយ និងរុះរើបន្លាលួសដែលខ្លួនបានលួចដាក់នោះ ចេញឲ្យអស់ជាបន្ទាន់ពីដែនអធិបតេយ្យរបស់កម្ពុជា។ កាលពីថ្ងៃទី១០ ខែសីហា សារព័ត៌មាន ខៅស៊ុត (Khaosod) របស់ថៃ បានស្រង់សម្ដីមេបញ្ជាការយោធភូមិភាគ២ របស់ថៃ ឧត្ដមសេនីយ៍ឯក ប៊ុនស៊ីន ផាតក្លាង (Boonsin Padklang) ថា លោកសូមសន្យាជាមួយរដ្ឋាភិបាល និងប្រជាជនថៃ ថា ខ្លួននឹងទាមទារយកប្រាសាទតាក្របី និងបិទប្រាសាទតាមាន់ធំ ឱ្យបានក្នុងពេលដ៏ខ្លីខាងមុខ មុនចូលនិវត្តន៍នៅដើមខែតុលា…
អគ្គនាយកនៃមជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) លោក ហេង រតនា អះអាងថា ស៊ីម៉ាក់រកឃើញសំណល់គ្រាប់បែកចំនួនជាង ១ពាន់គ្រាប់នៅក្នុងភូមិសាស្ត្រខេត្តឧត្ដរមានជ័យ ដែលសុទ្ធសឹងតែជាគ្រាប់ដែលត្រូវបានទម្លាក់ដោយកងទ័ពអាកាសថៃ អំឡុងពេលនៃការផ្ទុះអាវុធនៅតាមព្រំដែនរយៈពេល ៥ថ្ងៃ ចាប់តាំងពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥។ លោក ហេង រតនា បង្ហោះលើបណ្ដាញសង្គមហ្វេសប៊ុកផ្ទាល់ខ្លួនលោកថា មជ្ឈមណ្ឌលសកម្មភាពកម្ចាត់មីនកម្ពុជា បានរកឃើញគ្រាប់បែក និងគ្រាប់កាំភ្លើងធំចំនួន ១៥៤៩គ្រាប់ ស្ថិតនៅក្នុងភូមិសាស្ត្រខេត្តឧត្ដរមានជ័យ ដែលសុទ្ធសឹងតែជាគ្រាប់បន្សល់ទុកក្រោយការឈ្លានពានរបស់ថៃ។ លោក ហេង រតនា ឲ្យដឹងទៀតថា កាលពីថ្ងៃអាទិត្យ ទី១០ សីហា ក្រុមអនុព័ន្ធយោធាបរទេសចំនួន ១៤រូប មកពី ៩ប្រទេស បានទៅពិនិត្យទីតាំងភូមិថ្មដូន ឃុំគោកមន ស្រុកបន្ទាយអំពិល ខេត្តឧត្ដរមានជ័យ ត្រង់ចំណុចដែលគ្រាប់បែកប្រភេទ MK-84 ធ្លាក់ចំផ្ទះពលរដ្ឋខ្មែរ។ លោកអះអាងថា អង្គភាពស៊ីម៉ាក់ក៏កំពុងបន្តស្រាវជ្រាវរកទីតាំងសំណល់គ្រាប់បែក និងគ្រាប់ប្លោងបន្ថែមទៀត ក្នុងនោះរួមមានការដាក់ស្លាកសញ្ញា និងបោសសម្អាតគ្រាប់បែក និងគ្រាប់កាំភ្លើងធំគ្រប់ប្រភេទ ដើម្បីធានាសុវត្ថិភាពដល់ពលរដ្ឋនៅតាមព្រំដែនកម្ពុជា-ថៃ។ លោកអំពាវនាវឱ្យពលរដ្ឋទាក់ទងកម្លាំងជំនាញក្នុងករណីសង្ស័យជួបគ្រាប់មិនទាន់ផ្ទុះ ដើម្បីបញ្ចៀសគ្រោះថ្នាក់ផ្សេងៗដែលអាចកើតមានជាយថាហេតុ។ កន្លងមក អ្នកនាំពាក្យកងទ័ពអាកាសថៃ លោក…
រដ្ឋាភិបាលបារាំង ប្រកាសគាំទ្រប្រទេសម៉ាឡេស៊ី ក្នុងនាមជាប្រធានអាស៊ានដែលស្វែងរកដំណោះស្រាយជម្លោះតំបន់ដោយសន្តិវិធីជុំវិញបទឈប់បាញ់រវាងកម្ពុជា-ថៃ។ ស្ថានទូតបារាំងប្រចាំកម្ពុជា សរសេរលើទំព័រហ្វេសប៊ុករបស់ខ្លួននៅថ្ងៃទី១១ សីហា នេះថា ប្រទេសបារាំង សូមសម្ដែងនូវការសាទរចំពោះការប្រកាសកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ (GBC) កម្ពុជា-ថៃ នៅប្រទេសម៉ាឡេស៊ី កាលពីថ្ងៃទី៤ ដល់ថ្ងៃទី៧ ខែសីហា ដែលជាការបញ្ជាក់បន្ថែមលើការគោរពបទឈប់បាញ់ ចុះថ្ងៃទី២៨ ខែកក្កដា ហើយក៏ជាការចាប់ផ្តើមកិច្ចសន្ទនាសាជាថ្មីរវាងប្រទេសទាំងពីរដែរ។ ប្រភពដដែលអះអាងថា ប្រទេសបារាំង កោតសរសើរចំពោះការប្ដេជ្ញាចិត្តរបស់ភាគីទាំងពីរ ក្នុងការកាត់បន្ថយភាពតានតឹង និងការដោះស្រាយជម្លោះដោយសន្តិវិធីតាមច្បាប់អន្តរជាតិ។ ប្រទេសបារាំង បញ្ជាក់ថា បទឈប់បាញ់កម្ពុជា-ថៃ គឺជាការចាប់ផ្តើមកិច្ចសន្ទនាសាជាថ្មីរវាងប្រទេសទាំងពីរតទៅមុខទៀត។ ការអះអាងនេះ ធ្វើឡើងស្របពេលដែលទាហានថៃ នៅតែបន្តឈ្លានពានចូលទឹកដីកម្ពុជា ដោយរំលោភបំពានបទឈប់បាញ់ជាបន្តបន្ទាប់នាពេលនេះ។ កាលពីថ្ងៃទី១០ ខែសីហា មេបញ្ជាការកងពលតូចថ្មើរជើងលេខ៤២ ទិសប្រាសាទតាមាន់ធំ ឧត្ដមសេនីយ៍ត្រី នាក់ វង្ស បានប្រាប់ក្រុមអនុព័ន្ធយោធាបរទេសថា ថៃបន្តរំលោភបំពានបទឈប់បាញ់ ដោយក្នុងនោះពួកគេបានសាងសង់លេណដ្ឋាននៅលើប្រាសាទតាមាន់ធំ និងដាក់របងលួសក្នុងប្រាសាទថែមទៀត។ មេបញ្ជាការរូបនេះបន្ថែមថា យោធាថៃ ក៏បានប្រើប្រាស់គ្រាប់ចំពាមកៅស៊ូបាញ់លើកងទ័ពកម្ពុជាចំនួន ១០០គ្រាប់ផងដែរ កាលពីយប់ថ្ងៃទី៩ ខែសីហា ចូលលេណដ្ឋានទាហានខ្មែរ ខណៈទាហានខ្មែរបានត្រឹមរាយការណ៍ករណីនេះទៅថ្នាក់លើប៉ុណ្ណោះ តែមិនមានការតបតអ្វីឡើយ។ ជុំវិញបញ្ហានេះ អ្នកឃ្លាំមើលសង្គម លោក…
នៅថ្ងៃទី១៥ ខែសីហា ក្នុងសប្ដាហ៍នេះ ដែនដីអាឡាស្កា អតីតដែនដីរុស្ស៊ី ដែលរុស្ស៊ី បានលក់ឱ្យអាមេរិក ក្នុងតម្លៃជាង ៧លាន ២០ម៉ឺនដុល្លារកាលពីក្នុងឆ្នាំ១៨៦៧ នៃសតវត្សទី១៨ នៅលើដែនដីរដ្ឋទី៤៩ របស់សហរដ្ឋអាមេរិក នេះ នឹងមានព្រឹត្តិការណ៍ជាប្រវត្តិសាស្ត្រមួយ គឺជំនួបកំពូលប្រធានាធិបតីសហរដ្ឋអាមេរិក លោក ដូណាល់ ត្រាំ និងសមភាគីរុស្ស៊ី លោក វ៉្លាឌីមៀ ពូទីន ហើយអាចរំពឹងថានឹងមានជំនួបត្រីភាគីរវាងលោក ត្រាំ លោក ពូទីន និងប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី។ ជំនួបកំពូលត្រីភាគនេះ បើមាន គឺជាការបំបែកកំណត់ត្រាប្រវត្តិសាស្ត្រមួយដែលមេដឹកនាំប្រទេសត្រូវបង្ហូរឈាមនឹងគ្នា បានជួបគ្នាជាលើកដំបូងចាប់តាំងពីសង្គ្រាមរុស្ស៊ី-អ៊ុយក្រែន ផ្ទុះឡើងនៅខែកុម្ភៈ ឆ្នាំ២០២២។ អ្វីជារឿងបារម្ភ លោក ត្រាំ កំពុងដាក់សម្ពាធលើលោក ហ្សេឡេនស្គី ឱ្យយល់ព្រមតាមលោក ពូទីន ដែលលោក ពូទីន សុំទឹកដីភាគខាងកើតពីអ៊ុយក្រែន ដែលមានខេត្តចំណុះ២ គឺខេត្តលូហ្គាន់ និងខេត្តដូណែត តែខេត្តដូណែត កំពុងធ្លាក់ក្នុងភ្នក់ភ្លើងសង្គ្រាមយ៉ាងបង្ហូរឈាមរវាងកងទ័ពរុស្ស៊ី និងកងទ័ពអ៊ុយក្រែន។ យ៉ាងណា ប្រធានាធិបតីអ៊ុយក្រែន…
អ្នកប្រកបរបរ និងកម្មករសេដ្ឋកិច្ចក្រៅប្រព័ន្ធជាច្រើននៅកម្ពុជាកំពុងប្រឈមមុខនឹងប្រាក់ចំណូលថយចុះខ្លាំង ខណៈបំណុលពីធនាគារ និងមីក្រូហិរញ្ញវត្ថុ កើនឡើងជាបន្តបន្ទាប់។ មួយចំនួនក៏ត្រូវខ្ចីប្រាក់ពីឯកជន បន្ថែមលើបំណុលដើម។ វន់ ពៅ ប្រធានសមាគម IDEA បញ្ជាក់ថា ស្ទើរតែ ១០០% នៃអ្នកសេដ្ឋកិច្ចក្រៅប្រព័ន្ធមានបំណុល ហើយមួយចំនួនបានបាត់បង់ប្រភពចំណូល ដូចជា តូបនៅផ្សារដែលត្រូវរៀបចំឬរុះរើ។ លោកបានអំពាវនាវឲ្យរាជរដ្ឋាភិបាលពិចារណាផ្តល់ថវិកាជួយ និងរៀបចំកន្លែងប្រកបអាជីវកម្មសមរម្យ ព្រមទាំងជំរុញវិស័យទេសចរណ៍ឡើងវិញ។ ភាគីក្រសួងការងារ កត្តា អ៊ន លើកឡើងថា រដ្ឋមានគោលនយោបាយគាំទ្រអ្នកសេដ្ឋកិច្ចក្រៅប្រព័ន្ធ ដោយចុះបញ្ជីអាជីវកម្មឲ្យស្របច្បាប់ ផ្តល់ប្រាក់កម្ចីការប្រាក់ទាប និងបញ្ចូលកម្មករចូលក្នុងប្រព័ន្ធសន្តិសុខសង្គម។ ក្រោយវិបត្តិកូវីដ-១៩ អ្នកសេដ្ឋកិច្ចក្រៅប្រព័ន្ធនៅតែប្រឈមបញ្ហាជាច្រើន រួមទាំងបំណុលកើនឡើង ការប្រកួតប្រជែងពីជនបរទេស កង្វះអតិថិជន និងហានិភ័យចរាចរណ៍។
ខេត្តព្រៃវែង – នៅថ្ងៃទី ៧ ខែសីហា ២០២៥ អាជ្ញាធរជាតិប្រយុទ្ធប្រឆាំងគ្រឿងញៀន សហការជាមួយក្រសួងទេសចរណ៍ និងមន្ទីរទេសចរណ៍ខេត្តព្រៃវែង បានចុះផ្សព្វផ្សាយ និងអប់រំអំពីគ្រោះថ្នាក់គ្រឿងញៀនក្នុងវិស័យទេសចរណ៍ ដល់ស្ថានទីសេវាទេសចរណ៍ចំនួន ៣១ កន្លែង ដែលមានបុគ្គលិកចូលរួមសរុប ៥០៨ នាក់។ ឯកឧត្តម ឡោ សុវិជ្ជា សមាជិក និងប្រធានលេខាធិការដ្ឋានគណៈកម្មការប្រយុទ្ធប្រឆាំងគ្រឿងញៀន ក្រសួងទេសចរណ៍ បានឲ្យដឹងថា ការចុះផ្សព្វផ្សាយផ្ទាល់ដល់មូលដ្ឋាននេះ មានគោលបំណងពង្រឹងសមត្ថភាពម្ចាស់ និងអ្នកគ្រប់គ្រងស្ថានទីសេវាទេសចរណ៍ ដើម្បីអាចចូលរួមប្រយុទ្ធប្រឆាំងគ្រឿងញៀនបានប្រសិទ្ធភាពកាន់តែខ្ពស់។ នៅឱកាសនោះ លោក នុត សារ៉ន ប្រធានមន្ទីរទេសចរណ៍ខេត្តព្រៃវែង បានបញ្ជាក់ពីការងារលើកកម្ពស់ និងទាក់ទាញវិស័យទេសចរណ៍ ក៏ដូចជាការចូលរួមការពារសន្តិសុខ និងសុវត្ថិភាពសម្រាប់ប្រជាពលរដ្ឋ និងភ្ញៀវទេសចរ។ ថ្លែងក្នុងនាមឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ បានអរគុណដល់ក្រសួងទេសចរណ៍ និងមន្ទីរទេសចរណ៍ខេត្តសម្រាប់ការសហការគាំទ្រ។ គាត់បានលើកឡើងថា ការប្រយុទ្ធប្រឆាំងគ្រឿងញៀនគឺជាកិច្ចការរួម ដែលត្រូវការកិច្ចសហការបន្ត…
អាជ្ញាធរជាតិអប្សរា រួមសហការជាមួយ ស្ថាប័នស្រាវជ្រាវបុរាណវិទ្យាឥណ្ឌា (ASI) កំពុងអនុវត្តការជួសជុលខ្លោងទ្វារខាងត្បូងប្រាសាទតាព្រហ្ម ដែលដំណើរការរហូតដល់ពេលនេះ សម្រេចបានប្រហែល ៤៥% នៃផ្នែកសរុប។ លោក Chitranjan Kumar ប្រធានគ្រប់គ្រងការដ្ឋានជួសជុលប្រាសាទតាព្រហ្ម បានឲ្យដឹងថា ការជួសជុលនេះចាប់ផ្តើមពីដើមឆ្នាំ ២០២៣ ហើយមានផែនការបញ្ចប់នៅឆ្នាំ ២០២៦។ ការងារទាំងអស់ត្រូវបានអនុវត្តតាមបច្ចេកទេស និងអនុសាសន៍របស់ក្រុមអ្នកជំនាញ ICC–អង្គរ និងសំបូរព្រៃគុក។ គាត់បានបន្ថែមថា ក្រុមការងារបានសម្រេចការជួសជុលពង្រឹងគ្រឹះ ខឿន និងជញ្ជាំង ចាប់តាំងពីពាក់កណ្តាលឆ្នាំ ២០២៤។ បច្ចុប្បន្ន ការងារបានឈានដល់ដំណាក់កាលរៀបថ្មដំបូលស្លាបសងខាងទៅតាមលំនាំដើម។ ចំពោះផ្នែកដែលថ្មបាត់បង់ ឬខូចខាត មិនអាចប្រើវិញបាន ត្រូវបានជំនួសដោយថ្មថ្មី ដើម្បីពង្រឹងរចនាសម្ពន្ធឲ្យរឹងមាំ។ លោក Chitranjan Kumar ចាត់ទុកថា ផ្នែកដែលនៅសេសសល់គឺការជួសជុលកំពូលខ្លោងទ្វារដែលមានមុខព្រហ្មបួនទិស ដែលនឹងចំណាយពេលប្រហែលមួយឆ្នាំទៀត ដើម្បីបញ្ចប់ការងារទាំងមូលឱ្យបានស្របតាមផែនការនៅចុងឆ្នាំ ២០២៦។
អគ្គស្នងការដ្ឋាននគរបាលជាតិ បានប្រកាសកែសម្រួលសមាសភាព ក្រុមព័ត៌មានទាន់ហេតុការណ៍ (HOTLINE) សម្រាប់ជនបរទេសទាំងអស់នៅកម្ពុជា នៅព្រឹកថ្ងៃទី ៦ ខែសីហា ២០២៥ ក្រោមអធិបតីភាព នាយឧត្តមសេនីយ៍ ស ថេត អគ្គស្នងការនគរបាលជាតិ និងមានការចូលរួមពីតំណាងស្ថានទូត និងស្ថានកុងស៊ុលទាំងអស់ក្នុងព្រះរាជាណាចក្រកម្ពុជា។ នាយឧត្តមសេនីយ៍ ស ថេត បានពន្យល់ថា ការបង្កើតសមាសភាពថ្មីនៃក្រុម HOTLINE នេះ មានគោលបំណងសំខាន់ក្នុងការផ្តល់ភាពងាយស្រួលសម្រាប់កិច្ចសហការ និងទំនាក់ទំនងល្អជាមួយស្ថានទូត និងស្ថានកុងស៊ុល ដើម្បីផ្លាស់ប្តូរព័ត៌មានទាក់ទងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។ ក្រុមព័ត៌មានទាន់ហេតុការណ៍ ត្រូវបានបង្កើតឡើងសម្រាប់គោលដៅចម្បង៖ ផ្លាស់ប្តូរព័ត៌មានរហ័ស អំពីស្ថានភាព និងសភាពជនបរទេសនៅកម្ពុជា ដើម្បីធានាសន្តិសុខ និងសុវត្ថិភាពរបស់ពួកគេ ពង្រឹងកិច្ចសហការ រវាងកងកម្លាំងសន្តិសុខ និងជនបរទេសដែលរស់នៅក្នុងប្រទេសកម្ពុជា សម្រាប់ការបង្ការ និងទប់ស្កាត់បទល្មើស អំពើភេរវកម្ម និងអសន្តិសុខផ្សេងៗ លើកកម្ពស់ប្រសិទ្ធភាពការងារ ការពារសន្តិសុខ សណ្តាប់ធ្នាប់សាធារណៈ និងជួយធានាសុវត្ថិភាពដល់និវេសនដ្ឋាន ស្ថានទូត ស្ថានកុងស៊ុល និងមន្រ្តីការទូតទាំងអស់ ការពារវិនិយោគិន និងភ្ញៀវទេសចរ ដើម្បីបង្កើនភាពទុកចិត្ត និងទាក់ទាញវិនិយោគ និងទេសចរណ៍អន្តរជាតិ…
